Hodah Kan Rinh Lai!

Lai miphun cu Pathian nih tlangsang cung ah miphun pakhat in a kan
ser ve. Kan mah kan khua le kan ram teah nun kan hmang, ttuan kan rel
i a ho vanhai lo in zingnu pekmi kan Lairam chung ah kan tlongleng.
Ram a ngeimi miphun kan si.

Nihin ni ahcun kan ram cu ngaihchiat a tong i zaamtak lengmang a si
cang. Zeiruang ah dah ti cu kan mah le kan lungchung cioah a um laidah
tiah zumhnak ka ngei. Cuticun kan ram cu, Lai ram tiin Zaamtaakmi ram
ti tluk ah a hung cang. Hi lio ah kan ram hi holh heithiam sehlaw a
kan thloh hnga maw, ka fa le kal ko u tiahdah an kan ti hnga ti hi
lungthin ram in tuak tikah, kan nu;LAI RAM nih hin kalding cu a kan
siang taktak hnga maw ti hi ruah lo awk ah a ttha lo.

Vawlei thil sining aa thlen lengmang bantuk in, kan ram mui le sam le
kan miphun tthudirning cu nihin niah tlaihkhawh lo in aa thleng
lengmang ve. Kan ram chungah a rak tlongleng tawnmi Laimi, Lairam ah
ngam a si ti lo. Kan tlangsang cung ah a rak hninghno tawnmi
thingkung-ramkung, hmawng hna an ciam dih cang i an kan tlau tak dih
cang. Kan tlangsang cung in Lairam hninhnonak a pe tawnmi Cerh tiput
hna kan ram ah umkho tiloin an reu cang. Kan tlangsang cungah hnangam
tein a rak tlong mi ramlak saram an um ti lo, an zaam dih cang. Kan
fing le kan tlang ah rocarnak muisam lawng a leng cang.

Lai miphun hi Lairam hin kan zaam dih lai maw? Kan ram hi zaamtak in
miphundang nih maw ttuanrelnak ah an rak hman te lai? Miphundang ram
ah maw, sinum nun in Lai miphun hi vawlei cung ram kip ah Lai miphun
ti chimawk um lo in, kan i tthek sawhsawh lan lai? Ruah ngam a si lomi
biahalnak an si.

Lairam hi kan zaamtak dih lai tiah miphun meeting ah caihhmaiawk
(Agenda) in chuahpi va sisehlaw, meeting chungtel pakhat nih zeitin
dah bia na chim hnga. LUNGTLINGMI lei ah maw na kut na thlir lai,
LUNGTLING LO MI lei ah dah? Zaamtak dih ko u sih tihi cu a zaamcang mi
zong nih duh a si lai tiah zumhnak a um lo. Zaamtak thai ding ah kan
sian lomi ram a si ah... kan zohsawh ko lai maw?

FA le nih umpi zuam ti lomi NU,Lairam; a rocaar dih cangmi, Lai ram hi
A HO NIH DAH a remh tthan lai? A kan hringtu kan NU, Lai ram a FA le
LAIMI nih kan zuanhnawh lo i a harnak chungin kan khamh i, a chungril
fahnak vialte dam khawhnak ding ca, kan thlop lo ah har tein maw kan
thih ter ko lai............ Kan tlop lai ta.....

Ruat tti hna u sih;
1. Zei miphun dah na si?
2. Na miphun na daw maw?
3. Ram a ngeimi miphun na si maw?
4. Na ram na daw maw?
5. Na ram le na miphun hi vawlei in thlauding le hloh ding ah na lung
a tling hnga maw?
6. Vawlei ah zeican ( Kum zeizat) dah na nun lai?
7. A tu kum zeizat dah na si?
8. Na miphun le na ram caah na nunnak, na thazaang, na ngeihchiah, le
na caanttha zeivial dah na hman bal cang?
9. A ra laimi caan ah tah miphun caah hi rian hi ka ttuan lai tiah
timhlamh nak na ngei cang maw?
10. Zeitik in dah na thok lai?
NI HIN HI KAN CAAN TTHA BIK LIO CAAN A SI.

" NOT TO BE SERVED, BUT TO SERVE"
Rian ttuanpiak mi si ti lo in mi caah rian a ttuami LAI pasal-nusal;
Ram nih zeidah a ka pek lai ti a hngakmi Laimi si ti lo in ram caah
zeidah ka ttuan lai tiah khua a ruat mi Lai Miphun si i zuam in

Chinland Club Tleengcung ah
Tthutti hna u sih


Upatnak he
Zathawngcin